Выстава "Вызваленне" адкрылася ў рамках міждысцыплінарнага праекта "Генацыд беларускага народа: памяць і боль Гродзенскай зямлі", які рэалізуецца сумеснымі намаганнямі Купалаўскага ўніверсітэта і Пракуратурай Гродзенскай вобласці.
Над праектам працуюць выкладчыкі і студэнты факультэта гісторыі, камунікацыі і турызму, юрыдычнага факультэта, філалагічнага факультэта. Будучыя журналісты, гісторыкі, юрысты і перакладчыкі дапамагаюць у даследаваннях і перакладзе архіўных дакументаў, абнародаванні ўстаноўленых і зноў выяўленых фактаў злачынстваў фашыстаў і іх памагатых супраць беларускага народа.
Фотавыстава складаецца з трох блокаў, якія адлюстроўваюць пэўныя перыяды Вялікай Айчыннай вайны. Першая выставачная група расказвае аб вызваленні тэрыторыі заходняй Беларусі часткамі Чырвонай арміі ў 1939 годзе і ўз'яднанні Заходняй і Усходняй Беларусі. Другая група паказвае гледачу трагічны перыяд акупацыі Гродзенскай зямлі з 1941 па 1944 год. Трэцяя частка выстаўкі апавядае аб вызваленні Гродзеншчыны ў ліпені 1944 года.
Як адзначыў першы прарэктар ГрДУ імя Янкі Купалы Аляксандр Карэўскі, рэалізацыя міждысцыплінарнага праекта паказвае, што нас хвалюе захаванне гістарычнай памяці ў першародным выглядзе.
- Купалаўцы памятаюць, і мы робім усё магчымае для таго, каб перамагала праўда. Адкрыта ўжо другая выстава ў рамках праекта. Праведзеныя для гэтага даследавання паказваюць, што ёсць яшчэ шмат матэрыялу, які трэба абнародаваць і данесці да людзей. Цяпер ідзе інфармацыйная вайна і вельмі важна абараняць пазіцыі праўдзівымі фактамі, - адзначыў Аляксандр Карэўскі і падзякаваў усім, хто мае дачыненне да рэалізацыі праекта.
У рамках сумеснага ўзаемадзеяння купалаўцы і пракуратура правялі вялікую разнапланавую працу. Праект задумалі з мэтай данесці вынікі крымінальнай справы, узбуджанай генеральнай пракуратурай па факце генацыду беларускага народа. Увага акцэнтавана на ўстаноўленых фактах генацыду, на знішчэнні мірнага насельніцтва.
- У мінулым годзе вынік сумеснай працы пракуратуры і Купалаўскага ўніверсітэта паказаў высокі вынік і выклікаў цікавасць грамадскасці, таму адкрыццё другой выставы было заканамерным, - распавяла старшы пракурор аддзела пракуратуры Гродзенскай вобласці па наглядзе за выкананнем заканадаўства ўпраўленнем Следчага камітэта Рэспублікі Беларусь па Гродзенскай вобласці Наталля Змітрэвіч.
Важна не замоўчваць жахі вайны, не расказваць пра іх, змякчаючы куты. Занадта доўга аб Вялікай Айчыннай вайне казалі дыпламатычна. Важна, каб людзі ў поўнай меры ведалі аб зверствах фашыстаў на тэрыторыі Беларусі ў ваенныя гады.
Гродзенскі дзяржаўны ўніверсітэт імя Янкі Купалы